Nagduwa og mahjong gibirahan patay

CEBU, Philippines - Panimalos maoy nakitang posibleng motibo sa pagpatay sa usa ka lalaki nga nagduwa og mahjong sa sitio Polo, barangay Lapay sa lungsod sa Argao pasado ala una sa kadlawon sa miaging adlaw.  Giila sa kapolisan ang biktima nga si Allan Alberca, 53, kanhi taxi drayber lumolupyo sa  barangay Lapay sa lungsod sa Argao.

Sumala pa ni PO2 Renato Nacaytona, desk officer sa Argao Police Station nga ang biktima nagduwa og mahjong dihang miabot ang usa ka lalaki nga nagtaptap sa nawong ug mipusil kaniya sa maka-upat nga higayon, usa sa ulo ug tulo sa lawas hinungdan sa hinanaling kamatayon niini.

Ang suspetsado dali ra usab nga misibat padulong sa barangay Tiguib sa lungsod sa Argao human sa hitabo.

Narekober sa kapolisan ang upat ka kabhang ug usa ka deformed slug sa kalibre .45 sa crime scene. Matud pa ni Police Insp. Alejandro Batobalonos ang hepe sa Argao Police Station nga nahinabi sa mga tigbalita  nga gibanhigan na ang biktima sa miaging tuig samtang padulong kini nga mouli sa ilaha.

Ang umagad niini nga si Michael Valmoria pagkasayod sa hitabo gikatahong kalit niining girakrakan ang mga lalaki nga nag-inom sa duol sa ilang balay kay nagtuo kining sila maoy mipa-ambush sa iyang ugangang lalaki. Matud pang Batobalonos, si Alberca gidudahan sa mga lalaking girakrakan ni Valmoria nga maoy mipadakop kanila samtang sila naghantak.

Si Valmoria nga nabalhog na usab sa prisohan mao kadtong nabalita kaniadto nga mi-hostage sa iyang asawa human malutsi og warrant pipila ka bulan na ang nakalabay.

Nagtuo ang hepe sa Argao nga panimalos gyud ang motibo sa pagpatay kang Alberca. (/EIM) (BANAT NEWS)