Mga eskuylahan dili luwas ang pagka-desenyo

CEBU, Philippines - Duna g’yuy mga tunghaan nga nahimoan na og pakisusi sa mga structural ug civil engineers sa Cebu City School Board nga namatud-an nga peligroso na nga gamiton sa mga tinun-an.

Si Engr. Ronel Cullamar miingon nga pipila pa lang ka tunghaan ang ilang nahimoan og pakisusi sama sa Tisa Elementary School, Labangon Elementary School, Punta Princesa Elementary School, Don Sergio Osmeña National High School.

Matud ni Cullamar adunay kabahin niining maong mga tunghaan nga dili pa maayong gamiton nga ang mga bongbong niini kuyaw nga mahugno ug makakalas sa kinabuhi sa mga tinun-an.

Gimando ni Mayor Michael Rama nga ipadayon ang paghimo og pakisusi sa mga school buildings aron pagsiguro sa kaluwasan sa mga tinun-an.

Kini maoy rason nga ang kadagkoan sa Department of Education (DepEd) mihukom nga lugwayan ang pagsuspenso sa klase sa kinder, elementarya ug high school hangtud Biyernes.

Si City Schools Superintendent Rhea Mar Angtud miingon nga naglaum sila sa DepEd nga mahuman na ang inspection sa mga tunghaan sa dili pa ang Lunes.

Gituohan nga adunay mga tinun-an nga dili makatarong og klase unya sa sunod semana kay ang ilang mga classrooms dili pa maayong gamiton tungod sa pagkaguba sa linog.

Sa laing bahin si Konsehal Gerardo Carillo mihulagway sa structural designs sa mga tunghaan nga dili tukma tungod kay gamay ra kaayo ang iyang hagdan ug anaa ra mahimutang sa kilid.

Matud ni Carillo nga kun adunay aksidente nga mahitabo ang mga tinun-an maglumbaanay pagpanagan paingon sa tunghaan ug sigurado siya nga daghan ang mangadisgrasya.

Si Carillo gitahasan ni Mayor Rama nga pangitaan og paagi nga masulbad sa labing dali nga panahon ang maong problema. (BANAT NEWS)