CEBU, Philippines - Posibleng mokunhod ang pagpangabot sa mga turista sa dakbayan sa Lapulapu gumikan sa 7.2 magnitude nga linog nga nasinati sa Sugbu.
Matud pa ni Lapulapu Tourism Officer Hembler Mendoza mitug-an ngadto kaniya ang mga tagdumala sa mga hotels sa dakbayan sa Lapulapu diin apektado ang ilang operasyon tungod sa linog.
Kadaghanan sa mga reservations sa mga hotels sa Lapulapu gikanselar tungod sa kahadlok sa kasamtangang sitwasyon sa Sugbu human maigo sa linog.
Apan si Mayor Paz Radaza mipadayag nga dili angayang kabalak-an ang sitwasyon sa Lapulapu kay gamay ra ang kadaut nga nasinati niini atol sa linog.
Gani wala modeklarar og "state of calamity" ang dakbayan sa Lapulapu gumikan sa gamay nga epekto niini.
Gumikan niini buot mangayo og pormal nga mensahe gikan ni Radaza ang mga tagdumala sa hotels dinhi sa Lapulapu nga nagpahibalo nga normal ra ang sitwasyon ug operasyon sa dakbayan.
Ang maong mensahe mao unya ang ilang ipakita ngadto sa ilang mga kliyente nga padayon ang trabaho ug negosyo dinhi sa dakbayan sa Lapulapu. (BANAT NEWS)