Stampede sa distribusyon sa 4ps sa pinamungahan, Toledo usa patay

CEBU, Philippines - Patay ang usa ka bata sa lungsod sa Pinamungajan human kini mayataki sa mga tawo nga naglumbaanay og dagan gawas sa Pinamungajan Auditorium atol sa linog kagahapong adlawa.

Matud ni PO1 Ronilo Lawas nga nahinabi sa Banat News nga ang namatay naila nga si Shaiza Mila Petiluna, 4 anyos, lumolupyo sa barangay Tajao sa lungsod sa Pinamungajan.

Matud pa ni PO1 Lawas nga naangol usab ang laing 24 ka mga tawo lakip na niini ang pito ka menor de edad.

Matud pa ni Lawas nga nagdinaganay ang mga tawo padulong gawas sa Pinamungajan Auditorium dihang gitay-og kini sa linog apan nayatakan ang maong bata sa mga tawo.

Miingon si Lawas nga nahitabo ang maong stampede sa paghatag sa lungsod sa Pinamungajan sa Pantawid Pamilyang Pilipino Program. Gidala pa sa Pinamungajan District Hospital ang bata apan gideklarar nga dead on arrival sa mga doktor sa maong tambalanan.

Samtang angol ang 18 usab ka mga tawo sa dakbayan sa Toledo human usab sa stampede nga nahitabo sa Barba Sports Complex sa Poblacion sa dakbayan sa Toledo atol gihapon sa distribusyon sa 4Ps.

Naangol ang 12 ka mga tawo nga gidala sa Toledo City District Hospital samtang ang unom nga nagrabehan gidala sa Don Vicente Sotto Memorial Medical Center.

Ang mga nagrabihan giila nga sila si Feliciana Hinayas, 65 anyos, Nacario Lira, 19 anyos,  Mark Villamor, 44 anyos, Stephany Tagolaylay,   7 anyos ang upat lumolupyo sa barangay Media Onse sa dakbayan sa Toledo.

Samtang naangol usab si Michael Gabisan, 10 anyos, lumolupyo sa Poblacion ug si Analisa Degracia nga taga-Cantabaco sa dakbayan sa Toledo. (BANAT NEWS)