CEBU, Philippines - Ipaimbestigahan ni Lapulapu City Police Office Director Sr. Supt. Rey Lyndon Lawas ang taho nga dunay patrol car sa kapolisan sa Lapulapu nga gigamit nga service sa usa ka polis samtang nag-inom og beer duol sa usa ka resto bar sa barangay Basak sa dakbayan sa Lapulapu sa milabay’ng Biyernes sa gabii.
Si Lawas nakadawat og reklamo ang nagdala sa patrol car #30 nga nakauniporme pa midawat og beer atol sa ilang tour of duty. Wala hinuon hinganli pa ang maong mga polis.
Matud pa ni lawas usa kini ka lehitimong reklamo nga dili angayan nga palabyon hinungdan nga mohimo siya og "moto propio" investigation kalabot niini.
Gumikan niini mipahimangno si Lawas sa iyang mga sakop nga dili moinom samtang nag-duty kini ug dili magpundo sa usa ka bar o KTV aron dili kini matintal.
Kung masuta nga nakalapas gyud ang mga pulis nga nagdala sa maong patrol car aduna kini tukmang silot nga ipahamtang ni SSupt. Lawas.
Lakip ang hepe sa Station 3 sa kapolisan sa dakbayan sa Lapulapu ang ipatawag ni Lawas aron sa pagpaesplikar nganong dili masilotan ang mga sakop niini nga nagpabadlong.
Giingong dunay duha ka pulis luwan sa maong patrol car ang miparada duol sa Lutos Resto Bar nga gitunolan og beer ug giingong giinom kini sa sud sa patrol car. Wala usab nila bayari ang maong beer nga matud pa nakita sa mga tawo ilabi na sa reklamanteng mipadangat sa iyang reklamo ngadto sa DySS.(/EIM) (BANAT NEWS)