Duha angol sa pagpamusil

CEBU, Philippines - Duha ka mga tawo ang grabeng naangol sa managlahing  duha ka pagpamusil   sa Sugbu Sabado sa gabii ug kagahapon sa kaadlawon.

Naigo sa saag nga bala ang usa ka Vicente Candido Largo Jr., 21, ulitawo nga barangay Lantawan  sa lungsod sa San Fernando nga mi-disco atol sa tinuig nga pista sa barangay Basak, lungsod sa Compostela.Samtang nalingaw ang mga tawo ug ang biktima kauban sa ig-agaw kalit nga nagbutobuto maong nabungkag ang mga tawo ug naigo na diay ang biktima sa tuong ilok  ug gidala sa Vicente Sotto Memorial Medical Center sa dakbayan sa Sugbo.

Sa laing bahin, naangol si Winnie Tubigon Nuñez human kini napusilan sa iyang maguwang nga si Lito atol sa ilang pagtambong og pista sa  barangay Guinsay, dakbayan sa Danao sa miaging gabii.

Si PO3  Arnold Labine mibutyag sa Banat News nga nagkuyog ang managsoon sa pagpamista sa ilang paryente nga taga barangay Guinsay dihang nagkabingkil ang duha tungod sa kahubog.

Ang magulang nga wala na makapugong sa iyang kasuko ngadto sa iyang manghod miibot sa giloklok nga armas ug gipusil ang biktima sa bat-ang.

Gidala sa ilang mga kabanay ang biktima ngadto sa Danao Provincial Hospital samtang dali usab nga nakasibat pahilayo ang suspek. (/EIM) (BANAT NEWS)