Taksi mahimo nang matawag pinaagi sa cellphone apps

CEBU, Philippines - Mipirma ang Cebu City Traffic Operations Management  og memorandum of agreement (MOA) sa usa ka “private taxi-hailing software application firm” alang sa kasayon sa mga sumasakay pagkuha og serbisyo sa taksi pinaagi sa cellphone o internet.

Magamit usab kini sa CITOM pagkuha og impormasyon bahin sa dagan sa trapiko aron mabasehan sa paghulma og comprehensive traffic management system.

MiCab, usa ka taxi-hailing smartphone application maghatag og opsyon sa mga sumasakay tungod kay duna na may mga taksi karon nga adunay mobile phone units nga gi-install isip kabahin sa World Bank technical grant.

“We are working on proposing for traffic management initiative for Department of Public Works and Highways and city engineering. This agreement would enrich the quality of data that we will be getting,” sumala pang CITOM Executive Director Atty. Rafael Christopher Yap atol sa MOA signing.

Pinaagi sa internet ma-monitor na ang kapin usa ka gatos ka mga taksi nga gibutangan og Android phones sama sa Ken, CTC, Spider, Scorpion, ug uban pang taxi sa siyudad.

Pinaagi sa maong smartphones ma-monitor ang gibug-aton sa traffic sa mga lugar. “We have a total of 500 units. Around 200 to 300 remaining for deployment,” sumala pang Yap.

Ang kasabotan nga gipirmahan ni Yap ug ni Roberto Suson, representante sa app developer nga Gleek Corporation, ang MiCab Taxi Dispatching Application software  i-install usab sa Android smartphones sa CITOM ug Next IX.

Ang CITOM dunay 500 units nga Samsung Galaxy Y samtang susamang gidaghanon usab ang Next IX sa Cherry Mobile Android nga gimuntar sa mga taksi, ug plano karong matauran kini og 1,000 ka MiCab karong tuiga. (BANAT NEWS)