JVR nalimot Gullas dagha’g agi sa Talisay — Acabodillo

CEBU, Philippines - Si Mayor Johnny De los Reyes sa dakbayan sa Talisay wala mohatag og credit sa milabay’ng administrasyon sa proyektong iyang nasunod matud sa legal panel sa Nacionalista Party nga si Atty. Paterno Acabodillo.

Niadtong Huwebes si De los Reyes mibatbat  sa mga kalamboan nga iyang nahimo sa Talisay sulod sa 100 days niyang paglingkod isip mayor sa dakbayan

Sa gipahigayong press conference kagahapon si Acabodillo nagkanayon  nga ang proyekto sa Talisay nga paghatag og libreng lungon ug libreng lubong sa kabus nga Talisaynon  iya kini kaniadto ni  Mayor Socrates Fernandez ug nasunod na lang kini sa administrasyon ni De los Reyes.

Lakip sa nahisgutan sa maong press conference mao ang proyekto sa pagpaaspalto ni De los Reyes sa mga gubang karsada sa Talisay diin mikabat  sa P2 milyones ang gasto.

Matud ni Acabodillo nga wala usab i-credit sa administrasyon karon  ang pagpaaspalto ug pagpasemento ni Kongresista Gerald Anthony “Samsam” Gullas Jr. diin mikabat sa P13 milyones ang nagasto sa maong  kongresista.

Lakip sa 100 days accomplishment ni De los Reyes mao ang pagsaka sa abot sa ihawan sa siyudad ug matud ni Acabodillo nga  kanhi  iya  ni Kongresista Eduardo Gullas.

Alang  ni Acabodillo  nga si Gullas maoy nagpatukod sa nahisgutang double A nga ihawan apan wala usab mohatag og credit si De los Reyes  sa kanhi kongresista

“That is an insult to the people of the city of Talisay….mora ba’g way nahimo ang milabay’ng administrasyon”, ni Acabodillo pa.

Si De los Reyes nagpasumbingay  nga sama kuno siya sa mipuli og usa ka balay nga “walay hagdan” sa iyang paglingkod sa katungdanan.

Buot ipasabot niini nga sa iyang pagpuli daghang problema ang iyang gisunod o gisagubang ug ang maong problema nahatagan niya  og solusyon

Si Acabodillo midugang nga clarification lang ang iyang gibuhat aron mahibaw-an nga dunay nahimo ang milabay’ng administrasyon.

Si De los Reyes nga nahinabi sa Banat News kagahapon nagkanayon igo  lamang  niyang  gibatbat  nga  misaka  ang  kinitaan  sa ihawan  apan wala  siya  mangangkon  nga  iyang  proyekto  ang  maong  ihawan.

Gipasabot sa Mayor nga igo lang siyang misulti sa iyang mga nahimo nga kalamboan sa Talisay “mind your own business… ang ilaha, ilaha na…..ang akoa, akoa, duna pod sila’y katungod nga mosulti kung unsay ilang nahimo…alangan og iapil nako ang ilaha”. (WC) (BANAT NEWS)