CEBU, Philippines - Wala pa gayud makombinsir si Mayor Michael Rama nga ang kaalyado niya nga kapitan sa Barangay Suba – si Roger Resureccion – nalambigit sa illegal nga kalihukan sa iyang anak kabahin sa sugal nga masiao.
Matud ni Rama nga dili imposible nga si Kapitan Resureccion wala gyu’y kasayuran kabahin sa lihok sa iyang anak nga nag-coordinator sa sugal nga masiao ug hinungdan nga gidakop kini sa mga polis.
Ang mayor miingon nga nalooy gani siya kang Resureccion nga nalambigit sa illegal nga kalihukan ang anak.
Si Niño Resureccion gidakop sa mga sakop sa Regional Special Operations Group (RSOG) human rondaha ang balay sa kapitan ug nasakmitan kini og daghang ebidensya sama sa tally sheets sa masiao ug uban pa nga kahimanan.
Ang pagkasikop ni Resureccion nahimo pipila ka adlaw human nga ang RSOG mironda ug midakop ni Randy Boli-boli, ang gitumbok nga dakung masiao operator sa Sugbo ug “right hand†sa usa ka “masiao kingpin†dinhi sa Kabisay-an ug Mindanao. (BANATNEWS)