CEBU, Philippines - Napriso sa Talisay City Police Station detention cell ang usa ka notadong kawatan human kini masikop sa mga polis dihang misuway kini og panguot sa usa ka pasaherong babaye sa PUJ didto sa barangay Tabunok, dakbayan sa Talisay sa miaging buntag.
Ang suspetsado mao si Alexberto Villagracia Jr., 31, taga barangay Carreta, dakbayan sa Sugbo kinsa naimbargohan usab og usa ka paketeng shabu, usa ka kalibre .22 nga revolver nga dunay upat ka mga buhing bala ug mini nga ID card.
Gawas niini nasakmit usab sa mga polis ang duha ka drivers license usa niini sa United Kingdom (UK), passport ug ATM cards nga gipanag-iya ni Martyn Sydney Conway usa ka British national kinsa temporaryong nagpuyo sa dakbayan sa Lapu-Lapu.
Si Villagracia miangkon nga niadtong tuig 2011 napriso siya sa Cebu City Jail tungod sa kasong theft ug nakagawas siya niadtong Marso, 2012. Si Andrew Bon Geonzon, 34, taga lungsod sa Minglanilla ug drayber sa nahisgutang PUJ nga dunay rotang Naga-Basak mibutyag nga si Villagracia misakay sa iyang gipasadang PUJ didto sa Lawaan I, Talisay.
Matud ni Geonzon nga niadtong higayona nabantayan niya si Villagracia nga mitapad sa usa ka pasaherong babaye ug ang kamot sa suspetsado gitabunan sa iyang back pack dayon mihinay og kuot sa bag sa nahisgutang pasahero.
Matud usab ni Geonzon nga pag-abot nila sa ubos sa flyover sa Tabunok gipahunong niya ang sakyanan duol sa patrol car sa mga polis nga nagpundo ug gipakanaog niya si Villagracia.
Apan ang suspetsado nasuko ug gihapak ang iyang side mirror sa tuong bahin sa PUJ.
Gumikan niini mikanaog si Geonzon sa sakyanan ug misumbong kanila ni PO1 Euwen Pitogo ug PO1 Gerard Rollon. Si Villagracia giingong mikaratil og dagan tabok sa pikas karsada dayon sakay og laing PUJ apan nadakpan siya sa maong mga polis ug gitanggong sa prisohan. (BANATNEWS)