LGU giawhag publiko mobantay sa kalikopan

CEBU, Philippines - Ang Department of Environment and Natural Resources sa Central Visayas (DENR-7) miawhag sa mga Local Government Units (LGUs) nga mokampanya alang   sa pagpakabana sa  publiko kalabot sa geological hazards.

Kini aron nga kahatagan og dakong pagtagad ang mga lugar nga dali ra maigo sa panahili sa yuta ug baha ug usab mapugngan ang posibleng risgo sa kinabuhi ug kabtangan.

Matud pa ni DENR-7 Regional Director Isabelo Montejo nga mahinungdanon kaayo alang sa katawhan ug komunidad nga makahibalo  kung unsaon pagresponde ang  kalamidad.

Ang maong pahimangno ni Montejo namugna tungod sa dakong baha ug pagdahili sa yuta niadtong Oktubre 6 ning tuiga didto sa syudad sa Bayawan, Siaton, Basay, Sta. Catalina ug syudad sa Dumaguete probinsya sa Negros Oriental.

Sa maong katalagman  napugos pagbakwit ang dul-an sa 5,000 ka mga residente ngadto sa mga luwas nga lugar.

Samtang ang Mines and Geosciences Bureau (MGB) miluwat na usab  og geohazard threat advisories sa miaging Agosto 23 - 26 ning tuiga ngadto sa mga local chief executives nga naglakip sa mga mayor  sa upat ka lungsod sa probinsya sa Negros Oriental nga bag-ohay pa  nga  naigo sa kalamidad,

Ilang gitumbok nga ang maong  mga dapit nailhan na nga dali ra maigo sa baha ug panahili sa yuta pinaagi sa 1:50,000-scale ug 1:10,000-scale mapping. (BANATNEWS)