Laing barko sa 2Go nabag-id

CEBU, Philippines - Usa ka passenger vessel sa 2GO Shipping Lines nga M/V Saint Pope John Paul II ang mibag-id ngadto sa laing barko nga gi-angkorahe kagahapon sa buntag diha sa Pier Uno tungod sa kakusog sa hangin.

Si Weniel Azcuna, Cebu Philippine Coast Guard Station Commander mibutyag sa Banat News nga tunga-tunga sa alas 9:30 ug 10:00 sa buntag kagahapon mibiya sa Pier 6 ang maong barko padung ngadto sa Cagayan de Oro. Apan pag-abot diha sa Mactan Channel mipahinay ang passenger vessel tungod kay dunay laing barko sa Cokaliong Shipping nga nag-maniobra.

Matud ni Azcuna nga tungod sa kakusog sa hangin ang M/V Saint Pope John Paul II napadpad paingon ngadto sa gi-angkoraheng cargo vessel nga M/V RKK-2 sa RKK Shipping Lines.

Ang maong cargo vessel nakaangkon kini og gamay’ng lumping sa railings niini.

Gibutyag ni Azcuna nga ang M/V Saint Pope John Paul II dunay sakay nga 742 ka mga pasahero ug 189 ka mga tripulante ug gitugotan niya kining makalawig dayon paingon sa iyang destinasyon human ang kapitan niining si Ricardo Ababon mikompirma nga walay nahitabong kadaot sa barko ug walay mga naangol nga pasahero atol sa insidente. Si Azcuna miila sa kapitan sa M/V RKK-2 nga mao si Melchor Baluron. Atol sa hitabo dunay 19 ka mga tripulante ang maong barko apan wala hinuoy nasakitan kanila.

Apan ang PCG mimando sa duha ka mga kapitan nga mosumitir og marine protest alang sa ilang evaluation.

Si Azcuna midugang nga ang bise presidente sa 2GO nga si Lito Salvio mi-communicate na kini ngadto sa tag-iya sa M/V RKK-2 kabahin sa maong hitabo.  (BANATNEWS)