CEBU, Philippines - Dul-an duha ka buwan ang milabay human siya nadakpan sulod sa Palace of Justice, wala pa gihapon masugdi ang paghusay sa kaso ni Atty. Raul Sesbreño human ang mga huwes sa Regional Trial Court (RTC) mi-inhibit sa iyang kaso.
Kahinumduman nga niadtong Agosto 13, 2013, si Sesbreño gidakop sa mga sakop sa kapulisan pinasikad sa usa ka warrant of arrest nga giluwatan ni Judge Ester Veloso of RTC Branch 6 tungod sa kasong three-counts of serious illegal detention in relation to Republic Act 7610 o Child Abuse.
Si Veloso ang ikaduha nga huwes nga mikupot sa kaso ni Sesbreño human si Judge Manuel Patalinghug sa RTC Branch 22 mi-inhibit sa kaso kay gikiha ni Sesbreño ang maong huwes og kasong administratiba.
Pipila ka adlaw na ang milabay, mi- inhibit usab si Veloso sa maong kaso human ang akusado misang-at og petisyon alang sa pagpa-inhibit kaniya.
Kahinumduman nga si Sesbreño namahayag sa media nga ang amahan ni Veloso maoy executor sa gikwestyong luna nga iyaha usab giangkon.
Tungod niini, gi-raffle pag-usab ang kaso ug napadung kini kang Judge Bienvinido Saniel sa RTC Branch 20, apan si Saniel mi-inhibit usab tungod kay gikiha kini ni Sesbreño og kasong adminsitratiba.
Ang RTC Branch 22, 6 ug 20 pulos mga family courts. Ug tungod kay ang maong kaso naglambigit sa mga minors adto gyud kini masakop sa hurisdiksyon sa family court.
Apan human mi-inhibit si Saniel, gi-raffle pag-usab ang kaso ug napunta kini kang acting Judge James Stewart Ramon Himalaloan sa RTC Branch 24, apan mi-inhibit gihapon kini.
Ang maong kaso na raffle na usab sa RC Branch 21,apan si Judge Eric Menchavez mi-inhibit sa kaso tungod kay wala siya’y hurisdiksyon niini kay drug court ang iyang sala.
Apan una pa ma-raffle ang kaso ngadto kang Judge Ma. Lynna Adviento sa RTC Branch 58, si Sesbreño ni-file og urgent follow-up motion for resolution of long pending motion for bail ngadto kang Judge Raphael Yrastorza sa RTC Branch 14, isip pairing judge ni Patalinghug. Apan si Yrastorza mimando nga dili siya makaaksyon niini tungod kay gidestino siya karon paghusay sa mga election related cases ug usa usab siya ka assisting judge sa Mandaue City.
Kahinumdoman nga niadtong Septiyembre 7, 2011 dunay mga bata nga na-rescue sa usa ka panimalay nga gipasangil nga gi-padlock ni Sesbreño diha sa Barangay Lawaan III, Talisay City. (BANAT NEWS)