CEBU, Philippines - Kapin sa 30 ka mga mananagat ang gisikop sa Task Force Against Illegal Fishing sa Kapitolyo samtang luwan sa duha ka barkong panagatan nga giingong ilegal nga nanagat sa kadagatan sa isla sa Bantayan sa niaging adlaw. Matud pa sa hepe sa PENRO, Atty. Chad Estella, nga ang mga mananagat nigamit og pukot nga pino ang mata ug gidili subay sa balaud. Multa nga P5,000 ang ipahamtang ngadto sa mga dinakpan samtang gisakmit usab ang kuha niini nga isda ug ilang mga kahimanan sa pagpanagat.
“In lieu of the filing pwede sila magpa-arbitrate mobayad lang sila sa administrative fine,†matud pang Estella.
Nasakmit sa usa ka barko ang 51 ka banyera nga isda luwan sa barkong Laura Lavi nga gikan sa dakbayan sa Cadiz,Negros Occidental samtang 21 ka banyera sa AC 2 nga gikan sa lungsod sa Madridejos. Sutaon pa sa PENRO ang balor sa nasakmit nga mga isda nga maoy basihan sa ipahamtang nga multa.
Ang nasakmit nga mga isda gihatag ngadto sa Cebu Provincial Detention and Rehabilitation Center (CPDRC) ug ubang charitable institutions. Si Loy Anthony Madrigal, hepe sa Civil Security Unit sa Kapitolyo ug kabahin sa task force nibahad nga himoon pa nila ang dugang operasyon.
Matud pa ni Gob. Hilario Davide III nga kini kabahin sa iyang programa nga pagpanalipod sa kinaiyahan ug pagsanta sa ilegal nga panagat sa tibouk lalawigan sa Sugbo.
“We really have to enforce our fisheries laws, all laws a matter of fact. Pakit-on nato sila na we are serious really in our drive against illegal fishing,†matud pang Davide. Matud pa usab ni Estella nga dugay na ang ordinansa apan wala napatuman.
“Taudtaud na atong balaud but wala gi-implement or for whatever reason wala ma-implement og tarong. But karon ang giingon sa atong governor i-implement gyud maski kinsa maligsan,†dugang pa ni Estella. (BANAT NEWS)