CEBU, Philippines - Sa labing unang higayon, ang dakbayan sa Mandaue magsaulog sa Mechanical Engineering Week karong Oktubre 14-18, 2013 sa pagpakigtambayayong sa city chapter sa Philippine Society of Mechanical Engineer (PSME).
Ang PSME Mandaue Chapter gipangulohan sa presidente nga Engr. Joemarie Arib, kauban sa kanhi mga presidenti nga sila si Siegfred Sia, Bienvenido Tibon, Rex Teleron, Socrates Baylosis ug ubang opisyal nakigtagbo kang Mayor Jonas Cortes mahitungod sa maong kasaulogan.
Niadtong Septiyembre 20, 2013 ang konseho sa dakbayan nipasar sa resolusyon nga gipangamahan ni Konsehal Diosdado “Dadie†Suico nga nagdeklarar sa ikatulong semana karong buwana ug sa mosunod pang tuig nga “Mechanical Engineering Week†sa dakbayan sa Mandaue.
Matud pa ni Arib nga kini ang unang lakang sa pag-alayon sa lokal nga kagamhanan ug sa PSME nga matabangan ang syudad ug mga industriya nga motuman sa lagda sa Republic Act 8495 nga gitawag og “The Philippine Mechanical Act of 1998â€.
Iyang gipasabot nga ang mga propesyon sa mechanical engineering kinahanglan kaayo sa pagpalambo sa nasud.
Kini gumikan kay ang mga mechanical engineers adunay teknikal ug siyentipiko nga kinaadman nga motubag sa panginahanglan.
Si kanhi presidenti Corazon Aquino pinaagi sa Executive Order No. 319 niadtong Septiyembre 1988 mideklarar sa ikatulong semana sa Oktubre matag tuig nga Mechanical Engineering Week. (BANAT NEWS)