CEBU, Philippines - Unom ka video karera machine ang nasakmit sa kapolisan sa Carbon Police Station nga mironda sa karerahan sa barangay Ermita sa dakbayan sa Sugbo sa miaging gabii.
Matud pa ni Inspector Henry Eguia ang Deputy Chief for Operations sa Carbon Police Station nga nasakmit nila ang maong mga video karera machine tungod sa subsob nga kampanya nila batok sa illegal nga sugal.
Midugang si Eguia nga ilang gihimo ang maong ronda agi og tubag sa mando sa hepe sa Carbon nga si Police Sr. Inspector Lomente.
Sayo niini mimando si Lomente nga hingusgan ang kampanya batok sa illegal nga sugal sa mga lugar nga sakop sa Carbon Police Station.
“We have conducted a saturation drive as per instruction sa Chief of Police,†matud pa ni Eguia. Si Eguia kuyog sa lima ka mga elemento sa Carbon Police mironda sa sulod nga bahin sa barangay Ermita sa mga lugar nga gikatahong may mga molimoli ug video karera machines.
Sa ronda nga gipahigayon ni Eguia sa alas 11:10 sa gabii nasuta nga positibo ang maong lugar ug nakakuha sila og duha ka moli-moli ug usa ka video karera machine.
Samtang nakakuha usab sila og lain pang duha ka moli-moli ug usa ka video karera sa laing ronda nga gipahigayon nila sa alas 9:00 sa buntag sa miaging adlaw.
Mikabat og upat ka moli-moli ug 2 ka video karera machines ang nasakmit sa kapolisan sa Carbon Police Station sa maong operasyon.
Ang maong mga moli-moli ug mga video karera machines naa sa Carbon Police Station samtang naghulat kini og kamandoan kun kanus-a kini gub-a. (BANAT NEWS)