CEBU, Philippines - Patay ang usa ka babayeng tigpatanto human gipusil sa wala hiilhing mga lalaki sa tugkaran sa ilang panimalay sa Villa Angelina sa barangay Sabang, dakbayan sa Danao alas 9 pasado ang takna sa miaging gabii.
Si PO2 Roselo Campo sa kapolisan sa maong dakbayan miila sa namatay nga mao si Rosa Nile Herasta, 45, nagpuyo sa maong dapit.
Matud pa ni Campo sa imbestigasyon migawas ang biktima sa ilang balay dihang kalit kining gipusil sa tulo ka wala hiilhing lalaki ug dali nga misibat pahilayo sa maong dapit.
Ang biktima nakabaton og samad pinusilan sa iyang dughan ug patay na pag-abot sa Danao Provincial Hospital.
Gitutukan karon sa imbestigasyon ang kalambigitan sa negosyo niyang pagpautang ug uban pang personal nga motibo. (BANAT NEWS)