CEBU, Philippines - Gibutyag sa Police Regional Office-7 nga 27% sa mga barangay sa tibook Rehiyon 7 ang apektado na karon sa operasyon sa illegal drugs atol sa gipahigayon nga Talakayan sa Isyung Pulis sa Police Regional Office 7 kagahapong adlawa.
Matud pa ni Police Sr. Insp. Henrix Bancoleta sa Regional Anti-Illegal Drugs Special Operations Task Group (RAIDSOTG) nga sa 3,003 ka mga barangay, 809 niini ang nahugpaan na sa illegal drugs.
Ang shabu maoy usa sa mga paboritong gamiton sa mga adik sunod niini ang marijuana, nubain ug ecstacy.
Midugang si Bancoleta nga kun itandi sa miaging tuig misaka ang gidaghanon sa nadakpang shabu karong tuiga ug nag-una na niini ang dakbayan sa Sugbo nga gikan sa 44.3 gramos misaka kini og kapin sa usa ka kilo.
“Last year they have arrested 44.3 grams but this year they have arrested 1 kilo and 713 grams,†matud ni Bancoleta.
Midugang si Bancoleta nga 74 sa 80 ka barangay sa Cebu City ang apektado sa illegal drugs, sunod ang Mandaue City kay ang tanang barangay nahugpaan na niini, samtang sa Lapu-lapu, 20 sa 30 nila ka barangay ang dunay problema sa illegal drugs.
Samtang sa tibuok probinsya sa Sugbu, 159 sa 1,066 ka barangay niini ang apektado. Apektado sab ang 384 sa 1109 ka barangay sa Bohol, ug 25 gikan sa 134 barangays sa Siquijor samtang 120 sa 557 ka barangay usab sa Negros Oriental.
Si Supt. Pablo Labra II ang Acting Chief sa Regional Intelligence Division mibutyag nga dunay duha ka mga big time drug pushers sa Sugbo, usa niini naa sa lalawigan ug ang usa sa dakbayan sa Sugbo nag-operate.
Giklaro ni Labra nga walay drug lords sa Sugbo ug sa rehiyon apan duna lay mga big time drug pushers. “Here in Cebu in Region 7 we do not have iyung nagma-manufacture talaga, nag-produce. Here is only retail,†matud ni Labra.
“Ang pinakadako nga pusher diri sa ato labi na sa Cebu gets his supply from Manila ang reports nga nadawat nato he gets minimum of seven kilos a week,†dugang ni Labra.
Si Regional Public Information Officer Supt. Renato Dugan miingon nga dako og ikatabang ang pamilya ug ang eskwelahan lakip na ang komunidad sa kampanya kontra illegal drugs.
Giklaro hinuon sa kapolisan nga ang 73 porsiyentong kabarangayan gikan sa 3,003 ka mga barangay sa rehiyon wala maapektahi tungod sa kampanya sa kapolisan. (BANAT NEWS)