1 patay 1 angol sa pamusil sa Lapulapu

CEBU, Philippines - Namatay  ang usa  sa duha  nga nag-inom, samtang  naangol  ang laing  usa  dihang  gipamusil  sila  didto sa Saac 1, barangay Buaya,  dakbayan sa Lapulapu  sa miaging gabii

Giila ni PO2 Jesson Alparito sa homicide section sa kapolisan sa maong dakbayan ang  namatay nga mao si Benjie Carillas, 30, minyo ug ang naangol mao si Gilbert Casales, 23, minyo, nga pulos nagpuyo sa maong dapit.

 Giila  usab ni PO2 Alparito  ang suspetsado nga si Vergel Godinez, 21, ulitawo ,nga silingan  ra  sa mga  biktima.

Matud pa ni PO2 Alparito nga nag-inom ang duha ka mga biktima dihang ang suspek  nga nag-angkas  sa  usa ka  motorsiklo  kalit lang mipusil  kang Carillas sa makadaghang higayon.

Si Casales nga maoy kaatubang ni Carillas sa ilang panag-inom napagan usab sa maong pagpamusil ug naigo kini sa iyang bitiis nga maoy nakaingon sa iyang pagkaangol.

Human sa maong pagpamusil dali usab nga mipabulhot pahilayo ang motorsiklo nga giluwanan sa mga suspetsado.

Apan  nailhan na  si   Godinez nga maoy namusil  sa  mga  biktima  ug nadakpan kini sa follow-up operation nga gihimo sa kapolisan. Dali nga gidala sa Lapulapu City Hospital ang duha ka mga biktima ug human sa paghatag og pasiunang tambal dali kining gibalhin ngadto sa Vicente Sotto Memorial Medical Center sa dakbayan sa Sugbo.

Apan tungod sa daghang samad nga naangkon ni Carillas sa iyang lawas gideklarar kini sa mga doktor nga dead on arrival sa tambalanan. (Romeo T. Limpangog ug Bong Soriano/WC)

Caretaker sa Twin S gitusak sa bala patay

Namatay ang usa ka tawo human  matusak sa  mga  bala  ang lawas dihang  gipusil kini  sa  wala  hiilhing kriminal samtang  nagsakay  sa iyang bisiklita sa atubangan sa Gethsemane Church sa barangay Casuntingan, dakbayan sa Mandaue  sa miaging gabii.

Ang namatay mao si Charlie Rondina, 57, minyo, nga lumad nga taga Carmen, Cagayan de Oro ug caretaker sa Twin S Industry nga nahimutang sa dalan N.C. Cabrera sa barangay Casuntingan sa maong dakbayan.

Si PO1 Renato Canja sa kapolisan sa Presinto 4 sa Mandaue City Police Office (MCPO) nga nagbase sa barangay Casuntingan  mibutyag sa Banat News  nga gikan pa ang biktima nga nagpalit og sud-an sa usa ka restaurant  nga  dili  halayo  sa iyang gitrabahoan.

Nagsakay kini sa bisiklita ug padulong nga mopauli  sa  ilang  balay, dihang kalit lang nga gisundan sa tulo ka wala hiilhing lalaki nga nagsakay og motorsiklo.

Apan ang usa sa duha nga nag-angkas maoy   mipusil sa makadaghang higayon   sa biktima.

Gumikan sa mga samad pinusilan  sa ulo ug lawas sa biktima,  nawad-an  kini sa panimbang  busa misaliring  ang  bisiklita  niini  ngadto sa daplin sa karsada ug nalamba.

Si PO1 Canja miingon nga sa dapit nga nahagbaan sa biktima ilang nakaplagan ang upat ka mga kabhang sa bala sa armas nga kalibre 45 ug usa ka nalumping nga  bala niini nga ilang gituohan nga gikan  sa armas nga gigamit sa  wala hiilhing kriminal.

Dugang pa niya nga ang mga sakop sa Investigation Detection and Management Bureau (IDMB) sa Mandaue City  Police Office (MCPO) naghimo na og dugang pakisusi   sa maong  hitabo.

Sutaon  usab  nila  ang  mga anggulo nga maoy hinungdan sa maong pagpamusil nga naglakip  sa   iyang trabaho. (BANAT NEWS)