CEBU, Philippines - Gipailalom na sa imbistigasyon ang usa ka polis nga gipasanginlan nga nangilkil sa duha ka motorista niadtong Sabado sa gabii, matud pa ni Chief Insp. Noel Lomente, hepe sa Carbon Police Station.
Matud ni Lomente nga human niya nabasa ang balita nga napatik sa Banat News iyang giimbistigar kun kinsa ang maong polis ug iyang gipatubag sa maong pasangil niadtong Lunes.
Si Lomente miingon nga nakahatag na sa iyang tubag ang maong polis kansang ngalan iya unang gipugngan ug gihimakak niini ang pamasangil.
Dihang nahinabi sa Banat News si Lomente nagkanayon iya lang gihuwat ang affidavit sa mireklamo aron makompleto ang iyang incident report bahin sa maong pamasangil.
Mihangyo si Lomente sa mireklamo nga mohatag sa iyang affidavit aron mahuman na ang iyang imbistigasyon sanglit dili man siya makahimo og rekomendasyon basi lang sa balita nga iyang nabasa.
Gustong mahibaw-an ni Lomente kun interesado pa ba ang maong motorista sa pagpasaka sa maong reklamo.
“Akong gitawagan, ako siyang gi-txt, nagpaila ko niya lisod man sad kaayo, ang ako lang for the sake lang pod sa due process sa polis,†asoy ni Lomente.
Dihang nahinabi sa Banat News ang mireklamo nasuta nga dili na siya interesado sa maong reklamo apan andam siya nga makighinabi sa hepe sa Carbon Police Station.
Ang gireklamo nga polis matud pa nga gikan sa rehiyonal nga buhatan sa kapolisan ug sa Public Safety Company sa Cebu City Police Office sa wala pa madestino sa Carbon Police Station.
Matud ni Lomente nga nadestino sa Carbon ang maong polis usa ka adlaw sa wala pa mahitabo ang maong reklamo. (BANAT NEWS)