CEBU, Philippines - Gumikan sa gubot sa Zamboanga tali sa mga alagad sa gobyerno ug Moro National Liberation Front (MNLF) lain na usab ka 24 ka Zamboangeños ang mibakwit dinhi sa Syudad sa Sugbo niadtong Huwebes sa miaging semana.
Unom ka mga pamilya nga naglangkob og 24 ka indibidwal, kasagaran mga bata nga gikan sa Sta. Catalina, Zamboanga ang ania karon sa Sugbo ug temporaryong nagpuyo sa barangay Punta Princesa sa ilang mga parente.
Ang Sta. Catalina maoy usa sa apektado sa maong gubat diin kagatusan ka pamilya ang nawad-an og panimalay human kini sunoga sa mga sakop sa Moro National Liberation Front (MNLF). Samtang, human ideklarar ni Defense Secretary Voltaire Gazmin niadtong September 28 nga nahuman na ang gira, apan nagpadayon pa ang clearing operation didto. Ang mga pamilya nga mibakwit dinhi sa Sugbo mipadayag sa ilang intensyon nga mobalik sa Zamboanga. Si Cebu City Mayor Michael Rama mimando sa Department of Social Welfare and Services nga susihon ang mga pamilya, aron masuta unsay angay nga tabang ang mahatag sa city government kanila.
Niadtong September 26, 60 usab ka mga Zamboangeños nga mibakwit dinhi sa Sugbo gikan sa barangay Talon-talon, Zamboanga. (BANAT NEWS)