CEBU, Philippines - Nakigtagbo ang Regional Director (RD) sa Police Regional Office 7 sa mga nagkadaiyang Provincial Election Supervisor sa tibook rehiyon bahin sa areas of concern sa umaabot nga election kagahapon sa buntag.
Si Chief Supt. Danilo Constantino, RD sa PRO7 miingon nga tumong niya nga mailhan kun asang mga lugar ang matawag nga areas of concern sa kapolisan alang sa umaabot nga piniliay sa barangay sa Oktubre 28.
Miingon si Constantino nga pwede na mangayo og security escorts ang mga politiko ingon man ang bahin sa pagtugot sa pagdala og pusil luyo sa gipatuman nga election gun ban.
Nagkanayun si Constantino nga kadtong mga kandidato sa piniliay nga buot mangayo og security escort kinahanglan nga mosumiter og suwat ngadto sa buhatan sa Regional Election Director.
Kini human ipatuman nga opisyal ang Comelec gun ban ug pagsuspenso sa permit to carry firearms outside of residence (PTCFOR) alang niadtong nanag-iya og lisensyadong mga armas sugod niadtong Septiyembre 28.
Giklaro ni Constantino nga lakip sa gidid-an pagdala og armas ang mga sakop sa kapolisan, kasundalohan, ug ubang law enforcement agencies, sama sa mga security guard kinsa wala mag-uniporme ug wala usa’y duty.
Samtang gitin-aw ni Constantino nga makadala lamang ang mga law enforcement agency og armas de fuego kung kini anaa sa ilang oras sa trabaho.
Apan kung masakpan nga magtiner gihapon og armas bisan wala nay duty sa iyang trabaho mahimong kapasakaan siya og kaso bahin sa election gun ban, sumala sa bahad ni Constantino. (BANAT NEWS)