CEBU, Philippines - Mibahad kagahapon ang mga kadagkuan sa obras publikas nga pasakaan na nila og kiha ug sa samang higayon guroyon ang mga sakyanan nga giparking sa national highway dinhi sa Sugbo.
Ang warning gipalanog ni Atty.Brando Ray P. Raya sa Department of Public Works and Highways (DPWH)7 sa tulumanon AGIO Forum.
Matud pa ni Raya nga sa miaging Septiyembre 19 ning tuiga gilusad nila ang unang pag-inspection sa national highway tali sa dakbayan sa Talisay ug Minglanilla ug may 35 ka mga behikulo ang nasakpan nila nga giparking sa daplin sa highway.
Sa maong higayon gipasidan-an nila ni Raya ang mga tag-iya sa maong mga sakyanan kalabot sa balaod nga higpit nga nagdili nga butangan og mga personal nga butang ang daplin sa mga national highway.
Gisandig sa DPWH ang ilang pasidaan sa Presidential Decree (PD) No. 17 nga mipalig-on sa Philippine Highway Act sa 1953.
Matud pa ni Raya nga ang maong balaod higpit nga nagdili sa mga sidewalk sa national higway nga himoong parkinganan o kaha kan-anan ug uban pang mga butang nga makabalda sa mga behikulo nga moagi sa maong mga karsada.
Karong sunod buwan ipatuman sa DPWH nga higpit ang maong balaod pinaagi sa pagpasaka og kaso batok sa mga malapason sa balaod. (BANAT NEWS)