CEBU, Philippines - Onse ka mga lalaki ang nadakpan sa pagronda sa mga sakop sa Regional Public Intelligence Unit/Regional Special Operations Group-Regional Intelligence Department 7 batok sa illegal nga sugal nga masiao sa tulo ka mga balay sa barangay Pasil sa dakbayan sa Sugbo sa alas 10:40 sa miaging gabii.
Ang raid gihimo pinasikad sa tulo ka search warrants nga giluwatan ni Judge Raphael Yrastorza sa balay sa magtiayon nga Randy ug Richie Boliboli kinsa gitumbok nga masiao financiers.
Ang RPIU/RSOG-RID 7 raid gipangulohan ni Supt. Rex Derilo ang tulo ka panimalay ni Boliboli.
Nadakpan sa maong pagpangronda ang kanhi pulis nga si Angel Saavedra, 59, lumolupyo sa dalan F. Rallos sa dakbayan sa Sugbo nga nakuhaan og kalibre .45 sa iyang posesyon kinsa giingong nataktak na sa serbisyo sa miaging tuig tungod sa absence without leave (AWOL).
Nakuha atol sa maong raid ang kapin sa P150 mil nga balor sa mga kagamitan sa komunikasyon alang sa illegal nga sugal nga masiao ug P12 mil cash nga gituohang kita sa masiao.
Nakuhaan usab og kalibre .22 nga revolver nga may duha ka buhing bala ug laing duha ka buhing bala sa shotgun ug usa ka magazine.
Dungan nga gipahigayon ang raid sa tulo ka mga balay ni Boliboli nga miresulta sa pagkasikop sa onse ka mga lalaki.
Si Boliboli kusganong mihimakak nga iyaha ang laing duha ka mga balay nga dunay mga nakuhang ebidensya. Gihimakak usab niyang financier siya sa masiao.
“Naa man ko puyo sa Espelita, naay search warrant sa akong balay pero wala silay nakuha, pero katong didto sa search warrant dili to akong balay,†matud ni Boliboli. (/EIM) (BANAT NEWS)