CEBU, Philippines - Subling gipalanog sa Commission on Election kon COMELEC ang ilang bahad nga mopasaka og kaso batok sa mga barangay official nga magdumili sa paghatag sa P10 mil nga augmentation fund ngadto sa ilang buhatan alang sa galastohan sa pagpahigayon og Barangay Election karong Oktubre 28 ning tuiga.
Ang panganti sa Comelec pagkiha sa mga barangay officials gibuhian ni Atty. Ferdinand Gujilde sa Provincial Comelec Office human masuta nga may mga barangay kapitan ang nagdumili paghatag sa nahisgutang pundo.
Ang deadline sa paghatag sa maong pundo kutob na lamang sa Oktubre 18, napulo ka adlaw sa dili pa ipahigayon ang barangay elections.
Human sa maong petsa ang ilang buhatan mapugos na sa pagpasaka og kaso batok sa mga kapitan nga napakyas sa paghatag sa nahisgutang augmentation fund sanglit kalapasan man sa Omnibus Election Code.
Giklaro usab niini nga bisan pa man og masibog ang Sangguniang Kabataan kon SK Elections sa sunod tuig, ang pundo nga gikinahanglan nga ihatag sa mga barangay officials ngadto sa Comelec magpabilin nga P10 mil tungod kay mao man kini usab ang nalatid sa balaod. (/EIM) (BANAT NEWS)