CEBU, Philippines - "Wala koy labot anang proyektoha iya man na sa DPWH 7," mao kini ang reaksiyon ni Lapulapu City Mayor Paz Radaza kalabot sa paglambigit sa iyang ngan sa kasong gipasaka sa usa ka kontraktor sa circumferential road sa dakbayan sa Lapulapu nga wala mabayri.
Matud pa ni Radaza ang circumferential road proyekto sa national government ug dili siya maka-impluwensya sa DPWH niini.
Ang Department of Public Works and Highways (DPWH) gikiha sa kontraktor nga si Mary Ann Gonzalodo sa Gonzalodo Enterprises nga maoy kontraktor sa maong proyekto.
Si Radaza mibutyag nga wala siya mahimuot sa pagsugod sa maong proyekto nga walay igong koordinasyon sa siyudad atol sa pagsugod sa maong proyekto.
Matud pa nga nakahasol sa mga motorista ug daghang mireklamo lakip na ang tagdumala sa Plantation Bay nga si Efren Belarmino.
Human nga gipaabot ni Radaza ang maong reklamo ngadto ni DPWH 7 Regional Director Engr. Pedro Herrera Jr. ug Engr. Santiago Suico ang OIC District Engineer niadtong Feb. 20, 2012, si Suico mipadayag nga nagbuotbuot ang maong kontraktor (Gonzalodo) sa pagsugod sa maong proyekto bisan pa nga walay Special Allotment Release Order o SARO.
Gumikan niini nasuko si Radaza kay giguba ang dalan sa Marigondon apan wala tiwasa sa kontraktor ang maong proyekto.
Matod pa ni Radaza wala sila’y obligasyon sa maong kontraktor kundi ang buhatan sa DPWH ang manubag niini ug dili ang siyudad.
Giingong P20 milyones ang pundo alang sa maong bahin sa proyekto apan giingong wa mobayad sa P13 milyones kapin ang DPWH. (/EIM) (BANAT NEWS)