Manag-uyab na-hit and run

CEBU, Philippines - Hustisya maoy gisinggit karon sa mga ginikanan sa duha ka batan-ong manag-uyab nga na-“hit and run” sa usa ka itom nga Isuzu pickup diha sa dalan Ouano Avenue sa reclamation area sa barangay Subangdaku ala-una pasado ang takna sa miaging kaadlawon.

Si SPO4 Apolinario Nies, imbestigador sa Traffic Division sa Mandaue City  Police Office (MCPO) miingon nga ang managhigugma nga  namatay mao sila si Mary Joy Gigante, 17- anyos ug Reynan Tero, 21-anyos,   pulos taga barangay Casuntingan sa maong dakbayan.

Matud pa ni SPO4 Nies nga molabang sa pikas bahin sa dalan ang duha paingon sa Subangdaku dihang usa ka Isuzu pickup nga kusog kaayo nga nagdagan paingon sa dakbayan sa Sugbo ang kalit mipunggit kanila.

Dugang pa ni Nies nga bisan sa kusog nga pagbangga sa maong Isuzu pick up wala manumbaling ang drayber niini  ug mipabulhot hinuon kini sa pagpadagan sa direksyon sa dakbayan sa Sugbo.

Pipila ka mga motorista ang misuway unta sa paggukod niini apan tulin pa sa manatad ang drayber nga mipasirit sa iyang sakyanan palayo ug wala na gyud maapsi.

Ang duha nga nabunal ngadto sa taliwala sa karsada uban sa giluwanan nilang motorsiklo  daling gidala sa Mandaue City Hospital apan si Gigante gideklarar kini sa mga doktor nga dead on arrival, si Tero nabugtoan usab sa iyang kinabuhi paglabay sa pipila ka gutlo.

Ang side mirror sa maong sakyanan nalangkat pa tungod sa pagbangga ug gisubay na karon sa kapolisan kung si kinsa ang maong drayber ug tag-iya sa maong sakyanan.

Ang manag-uyab nga biktima gitupad nga gihaya diha sa ilang barangay. Matud pa nga tulo ka tuig nang manag-uyab ang duha ug parehong nagtungha sa kolehiyo. (/EIM) (BANAT NEWS)