Kanhi tanod gibirahan patay

CEBU, Philippines - Kanhi barangay tanod patay samtang usa ang samaran sa nahitabong panaglalis nga misangpot sa pagpamusil diha sa  Veterans Drive, sitio Grahe, barangay Busay sa dakbayan sa Sugbo sa alas 11:35 sa miaging gabii.

Ang namatay naila nga sila si Rogelio Labra Cadutdut, 55, kanhi barangay tanod sa barangay Busay. Samtang ang samaran naila nga si Samuel Dungog Jr., 51, residente sa maong barangay. Ang suspetsado naila nga si Arnel Abella, 56 anyos, lumolupyo sa dalan Salvador sa barangay Labangon nga negosyante og manga ug ang usa ka wala pa mailhing lalaki.

Base sa imbestigasyon nga nag-inom ang mga biktima kuyog ni Abella. Matud pa nga mitumaw ang panaglalis dihang giingong nangayo og pinaskohan si Dungog ngadto sa suspetsado kinsa nasuko.

Matud pa nga dunay gikuot sa iyang hawak ang suspetsado apan gibaraw kini ni Cadutdut maong milakaw kini. Apan paglabay sa 30-minutos mibalik ang suspetsado angkas sa wala pa mailhing lalaki luwan sa usa ka motorsiklo ug mikanaog dayong duol kang Cadutdot ug gipusil.

Sumala pa nga giilog unta ni Dungog ang pusil sa suspetsado apan gipusil usab siya niini sa iyang tuong kamot.

Patay diha-diha si Cadutdut nga nakaangkon og samad pinusilan sa iyang tuong dughan ug tuong kamot samtang gidala sa tambalanan si Dungog. (BANAT NEWS)