CEBU, Philippines - Ang Native Trees Nursery sa Ramon Aboitiz Foundation Inc. (RAFI) gidayeg sa taga Department of Environment and Natural Resources (DENR) ug gilaraw nga himoong pundohanan sa lumad nga mga kahoy sa Pilipinas.
Gitumong usab kini nga kakuhaan og hikat-onan sa mga estudyante ug professional ilabi na sa mga environmentalist. Si Cesar Stefan Rago sa RAFI nagkanayon nga gidayeg pag-ayo ang maong nursery sa nagkalainlaing ahensya sa goberno ilabi na sa DENR. Matud pa ni Rago nga sa miaging Marso ning tuiga , ang 8,000 metro kuwadrado nga nursery gisudlan sa 185 nagkalainlaing klase sa mga lubangon nga mikabat ang tanan og 125,873.
Ang labing daghang klase mao ang : tsa, puso-puso, lanutan, amugis/sambolauan, malaruhat, bakan, kulatingan, nato, banilad, ug malabakhaw.
Midugang si Rago gawas sa maong mga kahoy, may gitawag usab og grupo sa Philippine mahogany sama sa puti nga lauan, puwa nga lauan, mayapis, apitong, palosapis, narig, quisumbing, gisok, almon, yakal, yakal-malibato, guijo, manggachapui, mangasinoro, ug yakal-kaliot. Kining grupoha usa sa labing kusog nga mahalin nga klase sa kahoy, matud ni Rago. (BANAT NEWS)