CEBU, Philippines - Usa ka polis ang gipasanginlan nga nangilkil sa usa ka motorista nga gisita niini sa gipahigayon nga checkpoint sa alas 7:00 sa miaging gabii sa dalan Sanciangko sa dakbayan sa Sugbo.
Ang maong polis nga nagranggo og Police Officer One nadestino sa Carbon Police Station. Ang Banat News tuyo nga wala mohingalan kaniya tungod kay wala pay pormal nga kaso o reklamong gipasaka.
Ang mireklamo kaniya mao si Joseph Amarado, nga taga dakbayan sa Talisay ug ang uyab niini nga si Shynee Oficiar nga taga dakbayan sa Sugbo.
Matud pa ni Amarado nga luwan siya ug ang uyab sa motorsiklo niini apan paghiabot nila sa dalan Sanciangko gipara sila sa maong polis nga nagpaila kini nga usa ka Villacorta Charlie.
Matud pa nga gisita sila niini tungod kay walay side mirror ang iyang motorsiklo ug gipangayoan siya sa rehistro sa iyang motor busa iya kining gihatag.
Mipasangil si Amarado nga pagkakita sa maong polis sa kwarta nga naa sa lisensya niini diin didto pud nabutang ang rehistro sa motorsiklo sa biktima miingon kini nga kana na lang usa ka libo.
Midugang si Amarado nga wala man siya’y sensiyo maong mikuot siya sa usa ka gatos ug gibutang niya sa U-Box sa iyang motor ug matud pa ni Oficiar nga nakita niya nga gikuha sa polis ang maong kwarta.
Apan dihang nahinabi sa Banat News ang gipasanginlang polis miingon kini nga katungod ni Amarado nga moreklamo apan kusganon niyang gihimakak ang pasangil ug andam siya nga motubag sa maong pamasangil. Si Insp. Henry Eguia ang Deputy for Administration sa Carbon Police nga nahinabi sa Banat News miingon nga andam atubangon sa iyang sakop kun ugaling moreklamo si Amarado.
Si Amarado mibahad nga iyahang ipaabot kang city police director Sr. Supt. Noli Romana ang gihimo sa maong polis. (BANAT NEWS)