CEBU, Philippines - Ang mga sakop sa Cebu City Liquor Licensing Commission dili mohatag og special treatment sa mga langyaw nga sila makainom og mga ilimnong makahubog sa oras nga wala itugot sa ordinansa.
Dunay mga tagdumala og convenient stores nga nahimutang duol sa mga tunghaan nga gidid-an pagbaligya og bisan unsa nga ilimnong makahubog mihangyo nga tugotan lang unta sila nga makabaligya og beer ngadto sa mga langyaw nila nga customer.
Matud sa mga nanag-iya og convenience stores nga dunay mga foreigners nga kun mokaon dili moinom og tubig kun dili beer maoy ila nga pangayoon aron himoon nga mura’g tubig.
Si Msgr. Achilles Dakay nga gitudlo nga tsirman sa Liquor Licensing Commission sa dakbayan sa Sugbo, miingon nga kung kita gani mosunod sa ilang balaod didto sa ubang nasud, makatarunganon lang nga mosunod usab ang mga langyaw sa atong mga balaod.
Ang mga imnanan apil ang mga bar nga nasulod sa 300 metros nga gilay-on gikan sa mga tunghaan tugotan lang nga makabaligya og mga bino gikan sa alas dies sa gabii ngadto sa alas dos sa kaadlawon. Pamultahon sila og P5,000 kun sila madakpan. (/EIM) (BANAT NEWS)