Nangabuthan sa pabrika sa pabuto gitabangan

CEBU, Philippines - Giatiman sa lokal nga kagamhanan sa dakbayan sa Lapulapu ang mga biktima sa pabuto nga nagpabilin pa karon sa tambalanan human mabuthi didto sa Brgy. Babag dakbayan sa Lapulapu sa milabay’ng semana.

Matud pa ni Lapulapu City Mayor Paz Radaza ang siyudad migasto sa mga panginahanglanon sa mga biktima ilabi na ni Noli Aying nga nagpabilin pa karon sa VSMMC tungod sa 3rd degree burns sa kalawasan.

Buot usab nga pasakaan og kaso sa siyudad si Felisa Aying gumikan sa kalapasan niini nga nagpatrabaho og minor de edad bisan pa kung legal kini nga gitugotan sa pagama og pabuto.

Gumikan niini ipasusi ni Mayor Radaza sa DSWD sa iyang buhatan kung wala bay mga pabrika sa pabuto sa Brgy. Babag nga nagpatrabaho og mga minor de edad.

Samtang ang kapolisan ug kabomberohan sa dakbayan sa Lapulapu giawhag ni Mayor Radaza sa pagsugod na og inspeksyon sa mga pabrika sa pabuto sa siyudad kung duna ba silay permit.

Ang Lapulapu City maoy nag-unang buhatanan og mga pabuto dinhi sa Central Visayas ug karong umaabot na usab ang kapaskohan pinaspasay na usab ang pagpanghimo niini. (BANAT NEWS)

Show comments