CEBU, Philippines - Bisan kun mahingpit na ang operasyon sa mga modernong traffic light sa siyam ka mga intersection sa mga dalan sa dakbayan sa Mandaue sa gihapon ang mga sakyanan nga naglakip sa delivery trucks o pribado nga awto nga mosubay sa dalan Plaridel sa ilang pagpaingon sa amihanang bahin sa lalawigan adto moagi sa ilawom sa Marcelo Fernan Bridge alang sa ilang paglabay sa dalan United Nation Avenue sa barangay Umapad.
Kini ang gipadayag ni Edwin Ermac, pangulo sa Traffic Enforcement Agency of Mandaue (TEAM) nga nahinabi sa Banat Manobela niadtong miaging adlaw.
Gipasabot niya nga gituyo nila nga mosuong sa ilawom sa Marcelo Fernan Bridge ang tanan nga mga sakyanan nga mopaingon sa amihanang kalungsoran sa paghatag usab og kasiguroan sa nagdulhog nga mga sakyanan sa Marcelo Fernan Bridge gikan sa dakbayan sa Lapulapu.
Gisalikway ni Ermac ang pagtuo sa uban nga mga tawo gipaboran ang mga sakyanan nga mopaingon sa Mactan International Airport (MCIA) sa dakbayan sa Lapulapu nga pulos nagdali sa ilang pagsakay sa ilang flights.
Gitataw niya nga pagpaliko sa mga sakyanan nga naggikan sa dakbayan sa Sugbo ngadto sa ilawom sa Marcelo Fernan Bridge sa mga sakyanang padung sa amihanang bahin nga kalungsoran mao lamang ang paghapsay sa dagan sa trapiko.
Sanglit nagkasugat man ang mga sakyanan gikan sa dakbayan sa Mandaue ug Consolacion nga mopaingon sa dakbayan sa Lapulapu nga moagi sa nahisgutang taytayan.
Hinuon si Ermac mipasabot nga adunay daghang alternatibong kaagian nga mga dalan sa mga pribadong sakyanan nga molikay sa ilawom sa Marcelo Fernan Bridge.
Matud niya mahimo silang mosubay sa dalan P. Burgos sa barangay Alang-Alang ug dalan M.C. Briones sa barangay Ibabao Estancia ug mosubay kini sa dalan J. P. Rizal paingon sa lungsod sa Consolacion. (BANAT NEWS)