Kadalanan hawanan sa DPWH

CEBU, Philippines - Gihingusgan karon sa Department of Public Works and Highways (DPWH) ang paglimpyo sa kadalanan batok sa mga magparada nga mga sakyanan.

Si DPWH 7 regional director Ador Canlas mipahibawo nga ang operasyon nga ilang gihimo sa dakbayan sa Talisay ug Minglanilla sa niaging semana maoy signal nga tinud-anay ang ilang operasyon.

Ang DPWH nakig-alayon sa Land Transportation Office, Philippine National Police, ug lokal nga kagamhanan nga niresulta sa pagkasakop sa 35 ka mga sakyanan nga giparada daplin sa karsada.

Atol sa 888 News Forum sa Marco Polo Plaza kagahapon, giklaro ni Canlas nga ang pag-parking sa sakyanan daplin sa karsada usa ka ilegal.

“I saw many projects of road widening, grabe gihapon ang traffic,” nagkanayun si Canlas.

Niadtong Marso 2013, si Canlas nihangyo sa LTO nga i-deputize ang uban niyang mga tawo alang sa maong operasyon. Dili lang Sugbo ang puntariya sa operasyon kun dili lakip na ang ubang bahin sa Central Visayas.

Sunod nga target sa operasyon mao ang mga dakbayan sa Sugbo, Mandaue ug Lapulapu.

Matud pa ni Canlas nga gawas sa mga sakyanan, ubang makaali sa karsada ang ila usab limpyohan.

Ang mga tag-iya ug drayber sa mga sakyanan nga masakpang makalapas sa maong lagda sulod sa tulo ka higayun ang matangtangan sa ilang lisensiya.

Sayo niini si DPWH Secretary Rogelio Singson ang nimando sa mga rehiyonal nga buhatan nga kinahanglang limpyo ang kadalanan gikan sa mga makaali niini aron hapsay ug luwas ang mga motorista.

Lakip sa target sa operasyon ang mga nagnegosyo og radiator repair shops, vulcanizing shops ug mga car wash service shops nga anaa daplin sa kadalanan. (BANAT NEWS)