CEBU, Philippines - Ang Department of Environment and Natural Resources sa rehiyon 7 (DENR-7) migahin og P80 milyones alang sa pag-establisar sa labing moderno nga seedling nursery sa Central Visayas.
Matud pa ni DENR-7 Regional Executive Director Isabelo Montejo nga kining maong nursery maoy labing dako sa lima ka nurseriya sa nasud sa natad sa pagpatubo og maayong kalidad sa mga lubangon ubos sa National Greening Program (NGP).
Dugang pa ni Montejo nga ang maong pasilidad mogamit og mga ekipo alang sa bagging, pagpaturok og liso, hardening ug uban pang susamang aktibidad.
"This is something different from the conventional manner of growing seedlings considering the magnitude of seedlings to be generated in a year to address the tree planting and growing activity,†sumala pa ni Montejo.
Si Montejo nagkanayon nga ang maong nursery tukoron sulod sa 9.3 ektaryang luna sa Barangay Banban, Ayungon sa Negros Oriental.
Sugdan na kini karong umaabot Oktubre ning tuiga.
Sa tinguha nga makapatubo og daghang seedlings, ang DENR-7 ug ang Local Government Unit (LGU) sa Ayungon mipirma og Memorandum of Agreement (MOA) sa miaging Septembre 1 ning tuiga.
"We are very proud that Central Visayas particularly Negros Oriental, was chosen to be one of the pilot areas in the country to have this kind of mechanized nursery and with this, we can be assured of faster and quality production of our seedlings", sumala pa ni Montejo. (BANAT NEWS)