CEBU, Philippines - Duha ka mga menor de edad ang naangol human pamusila sa job order nga trabahante sa Commission on Election (Comelec) sa Dumanjug sulod sa usa ka internet café sa Barangay Looc, Dumanjug sa miaging udto. Ang suspek nga si Odelon Clavano matud pa nga hubog kini nga misulod sa internetan dayung paarak sa iyang armas de fuego sa makadaghang higayon nga miresulta sa pagkaigo nila ni Hernst King Admarelle Magno Villagonzalo, 14, sa iyang tuong batiis , ug Karl Hyginus Quirante, 17, nga samdan usab sa iyang tiil.
Si Clavano maoy miunay sa pagdala sa mga biktima sa clinic ni Dr. Josephina Malana sa Barangay Poblacion apan si Quirante gidala kini sa hospital sa siyudad sa Sugbo.
Ang mga biktima matud pa nagduwa lang og computer sulod sa D4D Internet Café uban ang ilang mga silingan sa dihang misulod ang suspek dayung bunot sa armas ug pamusil ngadto sa mga biktima.
Si PO3 Dionisio Tagupa, imbestigador, mibutyag nga dali ra pud nga misibat ang suspek human sa hitabo. Upat ka tingga sa bala ang napunitan didto sa nahitaboan.
Matud pa nga ilado si Clavano sa pagpanghulga pinaagi sa iyang armas sa maong lugar kun mahubog apan walay bisan usa nga misumbong sa kapulisan sa maong hitabo hangtud nga aduna nay nabiktima, sigun ni Tagupa.
“Maoy ingon sa mga tawo didto nga hilig gyud kuno na siya og bunot-bunot sa armas unya manion kung mahubog,†matud niya.
Nagpaabot ang kapulisan sa pamilya sa mga biktima sa pagsang-at og tukmang kaso batok sa suspek. (BANAT NEWS)