Sunog sa Pinamungahan P180 danyos

CEBU, Philippines - Mokabat sa P180,000 ang gibana-banang danyos sa duha ka building nga tulunghaan  sa elementarya  sa barangay Poblacion, lungsod sa Pinamungahan nga  nasunog   sa ala 1:48 ang takna sa miaging   hapon. Si PO1 Ronilo Lawas sa kapolisan sa maong lungsod nga nahinabi sa Banat News miingon nga usa ka Agosto Reyes nga taga barangay Poblacion maoy nagtawag sa telepono sa ilang buhatan nga nagpahibalo labot sa kalit nga pag-ulbo sa kalayo sa nahisgotang tulunghaan.

Dali nga nakapadagan sa fire truck ang kabomberohan nga mideklarar   sa  level 3   nga  sunog  ug  mitabang  usab  ang  mga  bombero  sa   dakbayan sa Toledo. Sa taho ni SFO1 Balbona nga karaan na nga edepisyo ang nasunog ug maoy ilang gituohan nga ang faulty electrical wiring maoy nag-unang hinungdan niini. (Romeo T. Limpangog/WC)

Mayor misuporta sa estudyante’ng gidaugdaog sa maestro sa Curva

Napugos sa pagpasaka og kasong kriminal si Medellin Mayor Ricardo Ramirez  sa pagsuporta sa reklamo sa mga ginikanan  sa kabataan nga nagtungha sa publikong tulunghaan sa ilang lungsod batok sa ilang magtutudlo kinsa nakahimo og daghan na nga kasaypanan.

Sa miaging  adlaw  11 ka Grade V nga tinun-an nga ubos ni Jeremias Pino nga magtutudlo sa Curva Elementary School sa lungsod sa Medellin ang mireklamo kang Mayor Ramirez nga gibulad sa init sa nahisgotang magtutudlo.

“Gibuwad sila sa init kay nasuko ang ilang maestro unya gipasanginlan sila nga nanawat  og kuwarta para mosulti og bakak,” nagkanayon ang mayor nga daw gibati usab og kapungot.

Sa miaging semana adunay walo ka ginikanan ang miadto sa buhatan sa Department of Education (DepEd)-Cebu province  ug mireklamo sa mga abuso nga gihimo ni Pino nga nakahatag na kaayo og dakong epekto sa ilang kabataan nga nagtungha sa maong tulunghaan.

Si Pino giakusahan nga mipasakit ngadto sa kabataan ug  nangulekta  usab og mga amotan sa ilang tulunghaan  nga walay pagtugot.

Si DepEd -Cebu Provincial School Superintendent Arden Minisit  nga nakadawat sa maong reklamo batok sa maong magtutudlo nag-umol na og investigating team  sa tumong nga masusi ang mga gialigar nga kahiwian nga nahimo  ni Pino.

Milaum   si  Ramirez  nga tangtangon  sa DepEd  kining  maong  magtutudlo apan  kun  dili  man, ipakiha  niya  kini sa  mga  ginikanan

Kun  way  mahimo,  miingon  si Ramirez  nga  moadto  siya  sa kalihim  sa edukasyon, ug  kun dili pa  gyud  matangtang  si Pino,  moadto  siya  sa Malacañang  magpatabang aron matangtang  gayud  ang  maong  magtutudlo,” ni Ramirez pa sa iyang pamahayag.  (BANAT NEWS)