Bol-anong pamilya midaug sa 4Ps contest

CEBU, Philippines - Usa ka Bol-anon nga banay ang migawas nga mananaug sa Rehiyonal nga Bangga sa Sumbanan sa mga banay sa Pantawid Pamilyang Pilipino sa tuig 2013.

Matud pa ni Rey Anthony Chua sa Philippine Information Agency (PIA) sa probinsya sa Bohol nga nakasaksi sa maong kalihokan, siya miingon nga mismong mga opisyales sa Department of Social Welfare and Development sa Central Visayas (DSWD-7) ang mitunol sa ganti ngadto sa pamilyang Hermosilla .

Misaksi usab  sila  si Sagbayan Administrative Officer Kirk RJ Suarez sa ngalan ni Mayor Ricardo Suarez ug ni Barangay Captain Lito Bonajos.

Dugang pa ni Chua nga gilupig sa banay ni Sederiosa Hermosilla nga nagpuyo sa  Sagbayan, Bohol ang walo ka mga mananaug sa tagsa-tagsa ka lalawigan sa Central Visayas nga misalmot sa rehiyonal nga bangga.

Sumala pa ni Chua nga sulod na sa duha ka tuig, ang DSWD-7, tinambayayongan sa National Committee on the Filipino Families (NCFF) mihimo sa Nasudnong Pagkaplag sa Modelo nga Pantawid Pamilya, kansang tumong aron ilhon ang mga banay  nga nagsubay sa mga balaod sa programa ug nagpakita sa ilang pagsagop sa mga mithi nga gitisok sa Family Development Sessions ((FDS) niini.

Samtang sa bahin ni Aileen Lariba, usa sa mga tigpamaba sa DSWD-7 siya miingon nga isip labing batakan nga sakop sa katilingban, ang banay, nga maoy nag-unang benepisyaryo sa programa, may dako nga gimbuhaton alang sa kalampusan niini.

Dugang pa ni Lariba nga ang pagpatuman sa FDS, ang iyang epekto ug ang ikatanyag nga tabang niini ilabi na sa pagpalig-on sa relasyon ug katalian sa matag sakop sa banay, mao nay usa sa mga labing bug-at nga sumbanan sa nasudnong bangga sa pagkaplag sa labing maayong banay nga napailawom sa programa.

Gipasabot ni Lariba nga pinaagi usab sa pag-ila sa mga sumbanan nga banay, buot sa DSWD-7 nga maaghat ang mga ginikanan sa pagpanghingusog sa pagbaton sa maayong katali-an sa katilingban .

Kini ilabi na sa iyang pagpakigsandurot sa komunidad agi og paghatag og dugang inspirasyon sa mga kauban kinsa naningkamot usab nga mouswag.

Nahimong criteria sa search ang 100% nga pagtuman sa mga kondisyones, (40%), pagbansay ug paghimo sa healthy living (25%), aktibong pagpanginlabot sa komunidad ug pagpaningkamot alang sa kaayohan sa kalikopan (20%), ug ang maayong pagdumala sa cash grants (15%).

Gawas sa banay nga Hermosilla, midaug usab sa bangga sa Bohol ang banay nga Mawili Family sa San Miguel ug banay nga Banados sa Carmen.  Laing banay nga Hermosilla (Tabogon,  Cebu), banay nga Senia (Borbon) ug banay nga Patingo (Catmon) ang migawas nga 1st, 2nd ug 3rd place nga mananaug sa Sugbo.

Sa Negros Oriental, midaug usab ang banay nga Gan-anan (Sta. Catalina), banay nga Enopia (Dauin) ug ang banay nga Del Rosario sa Manjuyod.  (BANAT NEWS)