Asawa mga mananagat gitudloa’g panginabuhi

CEBU, Philippines - Mikabat  sa  34   ka  mga asawa  sa  mga mananagat  sa lungsod  sa Barili ang   gituohang makatabang  og  dako  sa panginabuhi  sa ilang  pamilya human  sila  makatambong  sa duha  ka adlaw  nga Agri-Fishery Food Processing workshop   sa miaging  adlaw.

Si Roldan H. Saragena, Officer-in-Charge  sa buhatan  sa  Provincial Agriculturist   mibutyag nga ang  iyang  mga technician sa panguma   nga  sila  si Teresita  Bargahoy, Maria Teresa Abella  ug  Virginia Rossel maoy mipahigayon  sa  maong  seminar  didto  sa covered court sa barangay  Candugay, Barili.

Matud  pa  ni  Saragena  nga  sa maong  seminar gitudloan    ang  mga  asawa  sa  mga  mananagat sa paggama  og    chorizo, tocino, fish nuggets, camotetoron, poto cheese and squash maja.

Ang  nahisgutang seminar workshop  giisip  nga  usa  sa  mga  livelihood  projects  sa  Provincial Agriculturist office.

Sayo  niini  si  Barangay Capt. Dennis Morales mipadala  og suwat  hangyo  ngadto  sa buhatan  ni Saragena  aron matudloan  og  panginabuhi  ang  mga  asawa  sa  mga  mananagat  sa iyang  barangay.

Inabagan  usab  sa tanang  mga  opisyal  sa barangay  kansang  tumong  mao  ang  pagtabang  sa  pamilya  sa  mananagat nga  makabaton  og  dugang  kinitaan.

Pinaagi  sa maong  kaantigoan  ang  mga  asawa  sa  mga  mananagat  kasaligan  na  nga  makatabang  sa pagpadas-og  sa  kinitaan  sa ilang  mga  bana.  (BANAT NEWS)