Patay’ng lawas nadugta sa libon

CEBU, Philippines - Nagpabilin pa gihapong blangko ang kapolisan sa dakbayan sa Lapulapu sa pag-ila sa mamumuno sa usa ka tawo nga napalgang nadugta  didto sa  sitio San Vicente, barangay Basak sa maong dakbayan  sa miaging  buntag.

Si PO3 Lydo Pinos sa homicide section sa kapolisan sa maong dakbayan nga nahinabi sa Banat News miingon nga ang patay’ng lawas ni Jomar Braga, 23, nga lumad nga taga Mahayag, Molave, Zamboanga del Sur   napalgan sa kasagbutan sa maong dapit.

Matud pa niya nga  si Mary Jane Medrano, hingkod, nga nagpuyo sa maong dapit   maglubong  unta  sa namatay  niyang  iro .

Apan  gumikan  sa kabaho  sa palibot iya  kining gisuta.

Hilabihang  kurata  niya  dihang  maoy  misugat  kaniya  ang  baga  kaayong  lagong  ug langaw  sa   pagsum-ok  niya  sa labong  nga  mga  sagbot ug  didto  nakita  niya ang  lawas  patay  nga  nagbuy-od  sa yuta  nga  gigikanan  sa baho.

Sa tupad sa  patay’ng lawas sa biktima  didto  ang kalibre .38 nga revolver  nga  may  upat ka buhing bala ug usa usab ka kabhang niini.

Si PO3 Pinos miingon nga giila sa mga sakop sa pamilya ang biktima nga nagpuyo sa maong dapit ug  mitug-an    nga nawagtang kini niadto  pang Septiyembre 12 niining tuiga.

Hinuon  ipaubos pa  sa kapolisan  sa autopsy ang  maong  lawas  pagsuta  kun  naghikog  o gituyo  kini  sa pagpatay.  (BANAT NEWS)