CEBU, Philippines - Uyon si Mandue City COMELEC officer Atty. Anna Fluer Gujilde nga hingpit nang i-abolish ang Sangguniang Kabataan (SK).
Apan supak siya nga i-postpone ang SK Election nga gikatakdang idungan sa barangay election karong Oktubre 28 ning tuiga.
Sumala pa ni Atty. Gujilde nga mausik lang ang ilang pagpangandam sulod na sa pipila ka mga bulan ug ang kadako na sa gasto sa COMELEC kun dili kini ipadayon.
Ang kongreso sa sayo pa niduso og duha ka mga managlahing resolusyon nga nag-awhag sa pag-postpone sa SK elections.
Apan si Atty. Gujilde dili pabor nga lugwayan ang termino sa mga SK officials karon ug mas maayo alang kaniya nga putlon usab ang ilang termino kutob lamang sa Oktubre. Kini aron matataw gyud ang tukmang kalainan nga walay SK officials nga maglihok sa usa ka barangay.
Pinaagi niini, masuta usab kun gikinahanglan ba gyud ang serbisyo sa mga SK sa barangay o kaha mahimo rang dad-on ang pag-atiman sa mga sektor sa kabatan-onan sa ubang mga opisyal sa barangay. (BANAT NEWS)