Fishing boat nalunod, mekaniko missing

CEBU, Philippines - Padayong gipangita sa mga awtoridad sa Malabuyoc ang usa ka boat mechanic nga giingong nakuyog og kaunlod sa iyang gitrabahoang fishing boat diha sa kadagatan sa barangay Santo Niño sa maong lungsod.

Si PO2 Ronidilo Duerme, desk officer sa Malabuyoc Police Station sa pakighinabi sa Banat News miila sa na-missing nga mao si Joselito Falma, 45, residente sa maong barangay.

Matud pa sa report, si Falma ug usa ka 17-anyos nga si Michael Ebardo diha nangatulog sa FB Xander nga gipanag-iya sa usa ka Alexander Paril Quiñones, nga nag-angkorahe gibanabanang 25 ka metros gikan sa lapyahan sa dagat.

“Gi-anchor ra man nang barkoha kay wa pa man sila makapanagat,” matud pang Duerme kinsa midugang nga dautan kaayo ang panahon nianang gabhiuna sa Malabuyoc.

Matud pa niya kusog kaayo ang hangin ug nagbunok ang uwan nianang tungora ug giingong dagko usab ang balod.

Ang kauban ni Falma nga si Ebardo mibutyag sa kapolisan nga nahigmata siya sa paglagubo sa ilang fishing boat ug nabantayan niyang daghan na kaayong nakasulod nga tubig.

Iyaha untang gipukaw si Falma ug nag-iyahay sila og gawas apan wala na molutaw si Falma ug gituohang nakuyog sa panagatan sa ilawom.

Kagahapon gisawom sa mga sakop sa Philippine Coast Guard ang panagatan apan wala didto si Falma.

Matud pang Duerme posibleng nataligam-an sa duha ang paglimas sa maong panagatan nga unta giingong kada oras man kini haw-asan og tubig tungod kay duna kini buslot. (BANAT NEWS)