Ylanan mireklamong gisapawan sa iyang tahas

CEBU, Philippines - Nabalaka si Konsehal Val Ylanan sa dakbayan sa Talisay nga basin makasohan siya og administratiba tungod sa wala niya pagtuman sa direktiba ni Mayor Johny Delos Reyes.

Si Ylanan miingon nga ang anak sa mayor nga si city administrator John Yre De los Reyes maoy misapaw kaniya sa gisangon nga executive function kaniya.

Hulyo 18, 2013 dihang gihatagan si Ylanan sa mayor og executive function isip administrador sa Urban Planning Management and Infrastructure Planning Development ug administrador sa Economic Zone and Planning Office.

Lakip sa gihatagan og samang tahas mao sila si Bise Mayor Romeo Villarante ug Konsehal Danny Caballero ug Aldin Diaz apan sa uban silang mga departamento.

Si Ylanan mibutyag nga ang mga dokumento wala maabot sa iyang buhatan ilabi na ang pagpirma sa Preliminary Approval and Locational Clearance (PALC) sa simple subdivision.

“I want to put on the record nga wala ko mi-function kay wala man gyud sab sila’y gipasa sa akoang opisina,” ni Ylanan pa.

Subay sa patakaran ang tanang mga tag-iya og lote ug developers gi-required kining mo-apply og PALC ngadto sa buhatan sa City Planning and Development Coordinator una sila maisyuhan og development permit.

Tungod niini gipangayoan ni Ylanan og eksplinasyon  ang CPDC kabahin sa giingong wala pagtuman sa EO sa mayor. Ang CPDC ubos kini sa supervision sa city administrator.

Si Yre nga nahinabi sa Banat News nagkanayon kini nga kagahapon nagkaistorya na sila ni Ylanan kabahin sa maong isyu.

Iyang gipasabot nga ang karaang ordinansa sa nangaging administrasyon maoy ilang gibasehan niini nga nag-ingong ang city administrator maoy modumala sa economic zoning ug city planning.

Sumala pa niya nga maong iyaha kining gisalo nga tahas tungod kay wala pay kausaban sa ordinansa ug ilang gilikay ang mayor nga makalapas.

Andam hinuong ipasa ni Yre ang maong executive power ngadto kang Ylanan kung maamendar na ang ordinansa. (/EIM) (BANAT NEWS)