CEBU, Philippines - Gipaluyohan sa kadagkuan sa barangay Kamputhaw syudad sa Sugbo ang tinguha sa kagamhanan sa syudad nga ipatuman ang re-blocking sa mga kabalayan sa Purok 4 ug Purok 8 sa barangay Kamputhaw siyudad sa Sugbo diin nahitabo ang sunog niadtong nakalabay nga adlaw.
Tinguha sa maong lakang mao nga mapalapdan ang dalan sa maong lugar aron sayon sa emergency vehicles ang pag-responde.
Ang maong lakang nitumaw human ang Cebu City Fire Marshall nga si Major Conrado Doblois mireklamo sa kahuot sa agianan sa maong dapit maong nagkabanggaay pa ang firetrucks sa syudad ug sa Chinese Fire Volunteers.
Si Kamputhaw barangay kapitan Bong Bosamot uyon usab niini apan kinahanglan lang nga makabalik tanan og puyo ang maapektahan sa reblocking.
Lima ka balay ang naugdaw ug tulo ang partially burned sa maong sunog nga nagsugod sa ikaduhang andana sa balay ni Daniel Camocamo Sr. nga giabangan ni Geraldine dela Cruz tungod sa giingong nabiyaan nga nilung-ag gamit ang uling. (/EIM) (BANAT NEWS)