Mga mikiha sa Talisay Govt. wa dapigi sa korte

CEBU, Philippines - Tungod kay pakyas pagpresentar og titulo sa yuta, apelar sa mga residenteng giabog sa Talisay City government gibasura ni Judge Simeon Dumdum, Jr., sa Regional Trial Court.

Si Dumdum miingon nga judicial-affidavit sa mga residente inay Certificate of Land Title ang ilang napakita.

Gidasonan ni Dumdum ang ruling sa Municipal Trial Court in Cities (MTCC) in Talisay City, nga ang maong luna gipanag-iya sa Talisay City Government.

Ang syudad sa Talisay nipasaka og kasong civil for ejectment batok nila ni Marieta Base, Vicenta Daan, Susan Bacalso-Roa, Ophelia Bardillas, Lucina Deniega ug Loreta Solas didto sa MTCC.

Matud sa syudad nga sila ang tag-iya sa Lot No. 8293-New nga 6,256 square meters ang gilapdon subay kini sa titulo nga gihuptan sa siyudad nga giokupar karon sa mga tawo ug sa mga gipangkiha.

Ang siyudad magbutang og urban poor relocation site sa lugar, ug giingong prayoridad niini mao ang mga kasamtangang namuyo sa lugar. Apan kadtong mga nagmagahi ug mihagit sa gahom sa siyudad gi-disqualify tungod sa giingong wala nila pagtahod  ug pag-ila sa awtoridad  dakbayan nga maoy tinud-anay nga tag-iya sa maong luna.

Sa ilang tubag, ang maong mga residente nagkanayon nga nagpuyo sila sa Lot 660 of the Talisay-Minglanilla Friar Lands Estate, Talisay City ug dili Lot No. 8293-New.

Matod nila sa maong yuta na sila natawo ug hangtud karun nagpadayon ang ilang pagpuyo sa lugar tungod kay sila maoy gibinlan sa magtiayong Lorenzo Bacalso ug Fausta Bas nga maoy orihinal nga aplikante sa mga luna.

Matud pang Dumdum kung way ikapakitang titulo ang maong mga nangangkong maoy tag-iya sa luna nagpasabot kini nga walay basehan aron ilhon silang mao gyu’y tag-iya niini.(/EIM) (BANAT NEWS)