CEBU, Philippines - Wala makahuman og kaon sa iyang paniudto ang usa ka mag-uuma human gipusil patay pasado ala-una sa miaging hapon diha sa barangay Santikan dakbayan sa Danao.
Ang biktima nailhan nga si Dionecio Matos, 22, mag-uuma sa maong dapit diin nakaangkon kini og samad pinusilan sa iyang ulo ug dughan.
Matud pa ni PO1 Genric Gabutan sa Danao Police nga ang amahan sa biktima nga si Deogracia maoy mitaho sa ilang buhatan kalabot sa nahitabo sa iyang anak.
Pasado alas- 4 na sa hapon nakataho sa kapolisan ang amahan sa biktima kini tungod usab kay ang ilang dapit nahimutang sa bukirang bahin sa maong dakbayan.
Sa inisyal nga impormasyon nga nakuha sa kapolisan ilang nasayran nga ang biktima diha sa kusina nga bahin sa ilang panimalay nagkaon sa iyang paniudto.
Sa diha nga aduna na lay nadunggang sunod sunod nga paka sa buto sa armas nga naggikan sa kusina nga bahin sa ilang panimalay hinungdan nga ang amahan sa biktima daling misusi.
Didto ilang nakita ang biktima nga naglunang sa kaugalingong dugo nga wala nay kinabuhi tungod sa naangkon niini nga samad pinusilan.
Pangagpas usab ni Gabutan posibling gipalusot lamang ang armas sa bangag diha sa kusina kini aron dili makabantay ang biktima samtang nagkaon. Gisusi pa sa kapolisan kun unsay motibo sa maong pagpatay. (BANAT NEWS)