Maguwa’g manghud nagpinusilay pulos angol

CEBU, Philippines - Kritikal ang kahimtang sa  maguwang  nga sibilyan dihang  nakigpinusilay  kini  sa iyang  manghud   nga sakop sa Special Weapon and Tactic (SWAT) sa Mandaue City Police Office (MCPO) didto sa sitio Kalubihan sa barangay Jagobiao, dakbayan sa Mandaue alas 3:00 pasado ang takna kagahapon sa hapon.

Ang  anaa  sa tandugon  nga  kahimtang mao si Teresito Ligan alyas Patik, 30, minyo nga nagpuyo sa maong dapit ug ang nakapusil mao si PO1 Teresito Jermin Ligan, hingkod, kinsa  silingan  ra  sa  iyang  maguwang.

Si PO1Gerome Encallado sa SWAT  sa MCPO nga nahinabi sa Banat News miingon nga  nag-roving patrol sila  sa maong  dapit kauban  ni  PO1 Ligan,  dihang kalit  nilang nabati ang boto sa armas. Diha-diha  ila  dayon  kining  gisusi aron  pagsuta  kun  unsay  hinungdan.

Apan  ilang  nasuta  nga  ang  boto  sa maong  armas  gikan  sa armas  de fuego  sa  magulang ni PO1 Ligan. Si PO1 Ligan   diha-diha  milihok  ug  miawhag sa  iyang magulang  sa pagtahan sa gipaboto niining armas.

Apan  matud  pa  ni PO1 Encallado nga imbis maminaw sa awhag sa  iyang  manghud , kalit  hinuon niining  gipusil  ang  naulahi.

Maayo  na lang  kay  nagsul-ob  og  bullet  proof   busa  miuntol  lang  ang  bala  ug  wala makadut  sa unod  niini.

Giusban   pa sa pagpusil  si  PO1 Ligan   ug nasamad  ang   tiil niini   tungod  kay wa man  kini hapin  nga  bullet  proof.

Sa iyang  pagtuo  nga  patyon  siya  sa iyang  maguwang,  mibalos  pagpusil  sa PO1 Ligan ug  maayong  pagkaigo  sa nawong  sa  iyang  maguwang.

Ang managsoon nga pulos  angol dali nga gidala sa Chong Hua Hospital sa dakbayan sa Sugbo ug padayon pa kining giatiman sa mga doktor sa nahisgotang tambalanan. (BANAT NEWS)