CEBU, Philippines - Tungod sa wala pagpaduwa sa ilang anak nga makaduwa sa Cebu Schools Athletic Foundation, Inc. (CESAFI) 2013 Junior Basketball League nipasaka og kasong civil ang mga ginikanan sa usa ka tinun-an.
Ang Cesafi ug ang opisyales niini nga sila si President Fr. Manny Uy, Commissioner Felix Tiukinhoy Jr. ug screening committee Jess Himotas ug Danny Duran gireklamo tungod sa pag-disqualify sa usa ka 15-anyos nga bata nga makaduwa tungod sa “two-year residency rule.â€
Apan ang mga ginikanan sa bata mikwestyon sa maong rule diha sa korte ug misang-at og civil case alang sa injunction with temporary restraining order (TRO) and damages.
Matod nila nga ang maong rule mo- apply lang sa college students ug dili sa high school student. Tungod niana nangayo og 20 ka adlaw nga TRO ang reklamante sa korte aron dili iimplimentar sa CESAFI ang maong rule ug tugutan ang ilang anak nga makaduwa sa umaabot nga torneyo.
Ang ilang anak nalakip sa 15 ka mga players sa University of San Carlos (USC) high school.
Niadtong 2011, nagtungha sa Don Bosco Technology Center ang maong bata nga sakop sa Cesafi apan gibalhin ang bata sa San Beda College didto sa Manila niadtong 2012 aron makauban ang coach niini nga si Carlito Britt Reroma.
Apan tungod kay mibalik si Reroma sa Cebu tungod sa panglawas sa amahan nadawat kining coach sa USC basketball team. Misunod usab ang bata ug gitanyagan ni Reroma nga makaduwa sa USC Basic Education Department basketball team. Apan niadtong Agosto 3, 2013, sa opening sa maong liga wala makaduwa ang bata tungod kay wala tuguti sa screening committee sa Cesafi tungod sa maong rule, ug kung ipamugos nila kini i-forfeit ang duwa nila.
Tungod sa nahitabo, ang magtiayon nagtuong nalapas sa CESAFI ang katungod sa ilang anak. "Nalooy ko sa akong anak kay kapoy kaayo ang praktis ug sige pakundisyon ug pila ka buwan unya dili man diay makaduwa. Sayang gyud kaayo ang iyang preparasyon sa CESAFI," matod pa sa inahan sa bata.
Buot nilang pabayron og P50,000 nga moral damages ang mga hingtungdan ug giawhag ang korte nga mandoan ang CESAFI nga i-nullify ang disqualification sa USC team.
Ang Banat News misuway apan napakyas sa pagkuha sa habig sa CESAFI aron pagpatim-aw sa maong rules apan daan nang giinsister sa maong asosasyon sa mga nahaunang mga reports bahin niini nga ang ruling mopatigbabaw. (BANAT NEWS)