CEBU, Philippines - Usa ka kadudahang karton nga gibilin sa baggage counter sa usa ka mall sa dalan Colon kagahapon nasuta nga gisudlan og DVD ug dili bomba sukwahi sa katahap sa mga security guard.
Nakugang ang mga security guard sa usa ka mall human nila mapalgi ang usa ka karton didto sa baggage counter.
Si PO3 Almer Fabroa sa Special Weapons and Tactics (SWAT) mibutyag sa Banat News ug nagkanayon nga nagduda ang security guard sa maong karton tungod kay maayo kaayo kining pagkaputos og packing tape ug taod-taod na nga wala kini balika sa tag-iya.
Busa ila kining gi-turn-over ngadto sa Mobile Police Station 2 sa Operations Branch kinsa dali usab nga mitawag og panabang sa Mobile Patrol ug sa SWAT.
Ang tag-iya sa maong box nasuta nga si Eric Santos Torres, 52 , lumolupyo sa dalan Salvador Extension, barangay Labangon sa dakbayan sa Sugbo.
Matud pa ni PO3 Fabroa gibilin sa tag-iya kay may gipalit sa maong tindahan.
Nakapasamot sa pagduda sa mga security guard kay mitingog ang metal detector sa ilang paghiling sa maong karton busa giturn-over nila kini ngadto sa mobile Police Station 2 kansang sakyanan nag-parking sa kilid ra mismo sa maong mall. Pagbalik ni Torres didto na ang iyang box sa Mobile Police ug dali niya kining giadto.
Dihang giablihan ni Torres ang maong box atubangan sa mga polis nakita nga DVD lamang ang sulod sa maong karton ug dili bomba. (BANAT NEWS)