Brgy. Cayang sa Bogo himuong child labor free

CEBU, Philippines - Gitinguha  sa kagamhanan sa syudad sa Bogo nga himuong child labor free ang barangay Cayang sa maong syudad.

Sumala  ni Bogo city mayor Celestino "Junie" Martinez Jr. nga ang maong lakang ipaagi sa pagpatunhay sa ilang computer literacy program.

Si Mayor Martinez nagkanayon nga ang maong programa hingpit nga ipatuman sa iyang buhatan karong Nobiyembre ning tuiga.

Matud pa sa mayor nga nagtuo siya nga ang pagtanyag og computer literacy program ngadto sa kabataan ug molupyo sa maong barangay maoy kahigayonan nga dili na magtrabaho ang mga kabataan sa maong lugar.

Ang mayor niingon nga ang maong barangay mahimong gi-target nga mahimong child labor free aron ang mga kabataan dili na maladlad sa mga mabug-at nga mga trabaho nga  mosangpot  nga dili na  ganahan sa pagtungha sa tulunghaan.

Iya hinuon nga giangkon nga dili malikayan sa maong sitwasyon  ang daghang mga kabataan  nga  makatrabaho sa bug-at nga trabahoon tungod kay ang maong barangay nahimo mang sentro sa komersyo.

Daghan usab ang mga negosyante   nga  buot  mobubo og puhonan sa patigayon sa maong dapit.

Gipahibawo usab sa mayor nga ang iyang buhatan giabagan sa Department of Employment (DOLE) Tripartite Council in Education ug ingon man sa Business Process Management Information and Communication. (BANAT NEWS)